Gorgeçine, Mar u Dara Deskıne

Arêkerdoğ: U. Pulur

Angola ra jü Sanıke

Roce jü gorgeçine sona sere jü dare dı nisena ro u baslı wendene kena. Hêni wanena kı qı pers mekı rê! Dorme de dısmenê xo estê çinnê, xo virra kena. A sırı dı bınê dare dı maro dı şia beno. Mar hên guman keno kı jü sefkan nowu hatê ninu ser yeno. Baxo xodı teqet nêvineno yaki nêşikino bıveciyo serê dare, xeberê gorgeçine dero. Dara destekına kı (sarmaşık ağacı) puruşiya dare rê, cêreno aê verro, vano:

"Waê, a gorgeçine rê vace, venci xu bıbırno. Xo virra mekı ro kı, sefkani boyna na dormê dı fetelinê!" Dara destekıne, "mırê çı!." vana bırnena.

Gorgeçine ninanna bêxeber honay wanena. Herqeşi zor kena. Venci (vengi) xo suxi kena berc. Fıqara mı gorgeçine! A roce çêfê xo amo çıko, fındetene nêzana suxi wanena. Hama mar quman keno kı, raşti sefkanê na dorme dı fetelino. Çerexino, yeno ancia cêreno dara destekıne verro, vano:

"Se beno, xeberê na gorgeçina bêaqılê de! Na nejdi dı jü sefkanê fetelino. Baduna bena qırbanê venci xo!"

Dara destekıne:

"Ahuuu, mıra çı wazena? Mırê çı gorgeçine ra, mırê çı sefkani ra! Se kenê bıkırê" vana bırnena. Sefkan suxi beno nêjdi. Gorgeçine gewlê venci xo biya, wendena xora pêyser nêmana. Mar defa pêyınê xo çarneno dara destekıne, cêreno verro. Vano:

"Nıka deqeêna sefkan yeno naca. Gorgeçine rê vace herbi naca ra dürr bo!" Deê, merdena gorgeçine êynê dara destekıne dı niyo! Anciay a qarina vana:

"Tore vano kı se beno bıbo, mıre lazım niyo. Venci xo bıberne! Mı reet bıverde!" Mar êndi omıdê xo bırneno. Sefkan tufanci xo keno berc, nano gorgeçine ra. Êndi çiyo kı bıbo, biyo! Gorgeçine zê pelci dare, yena bınê. Sefkan ama bınê dare dı serkerd, waşt kı gorgeçine biciro. Na sırı dı, qurna dare dı mari vineno. "Sans naê rê vanê", "bê jü kemera, dı theyru purudayne naê rê vanê" vano, nafay tufanci xo hatê mari ser keno derg. Mari uca dı çiseno! "Ewro, qısmetê ma zaf veciya, xonça ma xeyli wes bena" vano, bê hewesa gorgeçine ceno keno zerê çante xo. Mari kı cêno puruşneno vıle xore, erceno hermanê xo ser. Hama mar deê ver ra, deê pêy ra sımotino ra yeno cêr. Sefkan sekeno sa, nêşiçino mari biciyo bero. Dusmıs beno, dormê xodı sêrkeno. Na sıre dı, çıme xo gıno dara destekıne. "Na kara mı vinena" vano. Kardia xo veceno, dara destekıne bırneno. Bê naa, mari rınd gıredano. Mari cêno xo dest, kono raê. Dara destekıne, cereme rişayna xo bê merdene ante, sefkani kı bê hewesa qotmışbi, şi çê xo.

Na sanıke hêni zano, jüyo kı vano "maro kı dêmisê mı nêbeno, hazar serre wes u war bo" uo kı riye dinadı her çirê "mıre çı" vano u qarıse thabay nê beno, inanne dersı da hewlê musnena.

Arêkerdoğ: U. PULUR