Beg Anamsın, Zof Xestesın

Mehmet Çapan

Omnono, germo.Dewe verê koy dera. Ko; nê berzo, nê ki alçağo. Tede esketê esto, fekê xo tengo zerê xo hirao.

Her serre heliyê yeno sereniya esketi de kemer ra halenê xo hurinda vırene de saneno cı. Jêrci ver kemer cor ra`ve cer taê ca sıpê keno.

Gegane heli dewe ser fetelino, cêr kergê nêvino! Xo nanoro ser, kuno pa finora hawa cêno beno. Hata ke heli leyrê xo keno pil, taê kergi benê boka cı.

A serre hokmati beşliê daivi Xıdi; Xıd kerdivi bekçiyê dewe. Lese ra kılm vi, beşli ke estênera hermê xo; gılê tıfongi, peê pasna de kasbiyêne. Naêra gore, dewızu pê Xıdi yaraniye kerdêne, huiyêne.

Rozê Yivrahim va; " Ero Xıdo! Beşli bıde mı na heli de bıcerevni." Yivrahim sefkan vi, qersune lona derjêni de kêrdene war.

Xıdi hermê xo ra tıfong ont da`ve Yivrahimi, va; "ha bızê pane".

Yivrahim tıfong guret. Heli ki amey`vi ra dust. Derece kerd berz, tıfong nave riyê xo vera. A deqa çımê xuyo bin hetê halêni ser şi. Zerrê xo nêguret ke rast pano. Lınge onte. Tıfongi va ´zırrng!´. Tayê teyr u tur perra ra şi. Yivrahim va; "Vicco! Ma ça remena!" Xıdi va; qersuna to cor perê," Yivrahim va; "ya."

Da-dêse rozu ra têpiya perozo. Germê omnoni ver şuanu mal ardo dewe, sıt dıto. Malo meğelde. Hermêt`ki şia dêşi de roniştiyê. Taê reştike rêsenê, taê puçu vırazenê, heto zu ra ki qesey kênê.

Heli, unca dewe sero çerexino. Yêmose va; "waê heli gumano, yisê bıkero!"

Bilana hermetu Amık-Kokıme, hêştay serre dera hona pêta. Gılê uşira xo mılayim mılayim da hard ro, va; "ma heli rê ki werd lozımo." Hermetu va; "ya ya!"

Daê de Welê Uşeni cêro vejia. Araq cı ra sono. Hermetu xo kerd top, guçikê çite ard riê xo ser. Weli va; "Mevındê! Ma xevere gureta ke, taşildari Mazgêrd ra biyê rast yênê. Yênê qamçurê mali bırnenê. Haydêrê câmordu dê, ma mali berime wedarime!"

Ele biye pukeleke, hetê hope ser da ra. Domani hope de uwe kenê xo ro. Ele domanu ra va; "Mevındê! Kınconê xo paykerê, şêrê xevere bıdê pilu ke, taşildari naê yênê qamçurê mali bırnenê! Gunê ma mali berime wedarime!"

Domani desınde wertê uwe ra vêjiayi. Hit hit kıncê xo kerd`ve xo serde, her zu hetê ra bi vindi, şi.

Pilu xevere gurete. Taê cên ra, taê wertê hêgay ra vêjâyi ameyi.

Mal meğel ra urzna ra, wertalığ toz de mend! Gay, mangêy, bızi mı tey sanay`ve xo ver, hetê esketi ser kerdi rast berdi. Mal kerd`ve esket, fekê esketi eve kêmer, eve dar u ber guret, kerd vindi, şi. Cêray`ra amey bınê tüyu de nişt ro, va; "lao taşildaru ke perskerd, unca herkes dı-hire bızu vazo?"

Wertê ra feqırê xo Alê Mele vi. Da-dêse bızê xo bi, cıra jüe lınga xo şikâiye biye. A meğel de mendi vi. Ali va; "Ez ayê ki bon çê de dan we. Van ´malê mı çino´." Tayine va; "Ey! Lao meke!" Ali gos panêkuya. Ustra bıze kaskerde berde zerê çêyi. Lıngi`ve sare ra gıreday, kerde wertê mırtelo cêra ra ame.

Werte ra satê şie-nêşie hire ospori dewe de vêjâyi. Dewuji vera cı şi. Taşildaru selam dave cı. Dewuzu va; "Ele kimi selam! Xoş gelmişler! " Ostoru ra amêy war, ostori daru ra gıreday. Çentê xo veti, kıtavi ve qelemera cıra onti. Her zu caê kemerê sero nişti ro. Eve tırki va; "Adı soyadı: Hüseyin Karaboğa!"

Dewuzu Usê Alê Qêr`ra va; " Ero, no namê tuyo!" Uşi va;

" Buyir beg!" Taşildaru va; " Kaç davarın var?" Uşên va; "Beg valla, üç kêçisın, bir tek yineksın." Eve na tore têdine Taşildaru rê dı-hire mali vati. Sıra amê Alê Mele.

Taşildaru name da wendene, va; " Ali Kızılkaya!" Alê Mele va; "Beg, mal yoğtur. Hepsi geverdi."

Taşildaru inam nêkerd. Uşti ra ke çê saê kerê. Sarê xo na ro, bi bul çêverê çêi de koti zere. Tenê roşti qulvıke ra sanıtêne zere. Tenê ke çımê xo şikâyi, nat-dot niada ke kurnede çiê wertê mırtêli de naleno. Va; "Bu nedir?" Alê Mele va; " Beg anamsın, zof xestesın."

Taşildari peyser cêray ra vêjâyi. Unca nişt ro ostoru hetê dewa bine ser da ra şi.

Pêyde dewuzu besenêkerd ke huayisê xo zaft kerê, vake; "He! He!" Huais dest de kes payra nêmend.

Memed Çapan
01.0ı.´94,
Kornwestheim/Almanya

Çıme: Ware-6